सफा तरकारी तर फोहोर छ बजार (तस्विरहरु)

काठमाडौँ
१० चैत्र । सफा र राम्रो तरकारी खान मन कसलाई नलाग्ला ? त्यसैले हामी उपभोक्ता टाढैको भए पनि राम्रो र सफा स्थानमा गएर नै तरकारी किन्ने गर्दछौँ । तरकारी मात्रै होइन, अन्य सामग्री किन्नको लागि पनि हामी सफा र राम्रो ठाउँ रोज्दछौँ ।

काठमाडौँ देशको सङ्घीय राजधानी त हो, तर उचित व्यवस्थापन नहुँदा यो सहर कुरूप बन्दै गएको छ । यसकै एउटा उदाहरण उपत्यकाका तरकारी बजारहरूलाई लिन सकिन्छ । काठमाडौँ उपत्यकाका अधिकांश तरकारी बजारहरू अस्तव्यस्त छन् । फोहोरको व्यवस्थापन हुन नसक्दा पछिल्लो समय कुरूप बन्दै गएका छन् । फोहोरको उचित व्यवस्था नहुँदा तरकारी बजारमा दुर्गन्ध फैलिएको छ । जसका कारण बजार पुग्ने उपभोक्ताहरू मुख छोपेर तरकारी किन्नुपर्ने बाध्यतामा छन् । तरकारी बजारमात्रै होइन, उपत्यकाका तरकारी बजारमा जाने बाटो व्यवस्थित नहुँदा हिलाम्मे देखिन्छन् ।

हिउँद याममा त हिँड्न सकस हुने बाटो अब वर्षा याममा पानीले भिजाएसँगै कस्तो होला, आफैँ कल्पना गरौँ । अव्यवस्थित तरकारी बजारलाई व्यवस्थित बनाउने बारेमा सरोकारवाला निकायहरू मौन देखिन्छन् । फोहोरका कारण फैलिन सक्ने महामारीलाई मध्यनजर गरी सरोकारवाला निकायहरूले स्वच्छ र सफा ठाउँ र खानेकुराको ग्यारेन्टी गर्न आवश्यक छ । नभए आगामी दिनमा यही दुर्गन्धका कारण अर्को महामारी नफैलेला भन्न सकिँदैन । हेरौँ केही तस्बिरहरुः