अव्यवस्थित बस्ती हटाउने, कपन खोलालाई व्यवस्थित गर्ने कुरा सधैँ कुरामै रह्योः मेयर बालेन

काठमाडौं । काठमाडौंका मेयर बालेन्द्र शाह (बालेन)ले उपप्रधानमन्त्री तथा शहरी विकासमन्त्री प्रकाशमान सिंहको आलोचना गर्दै सामाजिक सञ्जालमा एक पोस्ट लेखेका छन् । आइतबार कांग्रेसबाट निर्वाचित वडाअध्यक्षहरूले कार्यपालिका बैठक बोलाउन माग गर्दै बालेनलाई निवेदन दिएका थिए । वडाअध्यक्षहरूले निवेदन दिएपछि असन्तुष्ट बनेका बालेन उपप्रधानमन्त्री सिंहमाथि खनिएका हुन् ।

उनले सामाजिक सञ्जालमा लेखेका छन्, ‘अव्यवस्थित बस्ती हटाउने, कपन खोलालाई व्यवस्थित गर्ने, बालमन्दिर बचाउने, सार्वजनिक सम्पत्ति जोगाउने प्रयास गर्ने कुरा सधैँ कुरामै रह्यो । कहिले गर्ने हो ? मलाई हराउने नाममा आफ्नो शहर, क्षेत्र र देशचाहिँ नहराउनुहोला । यत्रो गणेशमान सिंह, पी.एल. सिंह र नेपाली कांग्रेसको इतिहास माटोमा नमिसाउनुहोला ।’