काठमाडौं । अख्तियार दुरुपयोग अनुसन्धान आयोगको उपसचिव हुँ भन्दै किर्ते कागज बनाएर धम्क्याउने एक जनालाई प्रहरीले पक्राउ गरेको छ।
काठमाडौँको तारकेश्वर बस्दै आएका डोटीको शिखर नगरपालिका–४ का ऐभानबहादुर महरालाई टुसाल चोकबाट पक्राउ गरिएको प्रहरीले जनाएको छ।
पक्राउ परेका महराका साथबाट प्रधानमन्त्री तथा मन्त्रीपरिषद्को कार्यालय, उद्योग वाणिज्य तथा आपूर्ति मन्त्रालय र राज्यमन्त्रीको सचिवालयका किर्ते लेटरप्याड बरामद गरिएको छ। साथै प्रहरीले विभिन्न बैंकको स्टेटमेन्ट, एटिएम, चेकबुक, हिसाब राखिएको डायरी र वाणिज्य बैंकको डेप्युटी म्यानेजरको परिचयपत्र समेत बरामद गरेको छ।
प्रहरीका अनुसार महरा राष्ट्रिय वाणिज्य बैंकका पूर्व कर्मचारी हुन्।
उनीमाथि किर्ते कागज बनाउने र सरकारी पदको दुरुपयोग गरेको आरोपमा अनुसन्धान जारी रहेको प्रहरीले जानकारी दिएको छ।
प्रतिक्रिया