चन्द्रपुर
रौतहटको माधवनारायण नगरपालिकाको आफ्नै सुविधा सम्पन्न प्रशासनिक भवन निर्माण कार्य सम्पन्न भएको छ ।
सोही नगरपालिकाका मेयर वैजनाथप्रसाद यादवले जग्गा दान दिएपछि नगरपालिकाको सुविधा सम्पन्न प्रशासनिक भवन निर्माण भएको हो । विगत नौ वर्षदेखि भाडाको घरमा रहेको नगरपालिकाको कार्यालय यस वर्ष भने आफ्नै भवनमा सरेको छ । भवन निर्माणका लागि मेयर यादवले माधवनारायण नगरपालिका–६ माधोपुर बजारमा आफ्नो नामको पाँच कठ्ठा र आफैँले सञ्चालन गरेको मठको नाममा रहेको पाँच कठ्ठा जमिन नगरपालिकाको भवन निमार्णका लागि मेयर यादवले दान गरेका थिए ।
मेयर यादवले १० कठ्ठा जग्गा नगरपालिकाका नाममा दर्ता गराएर प्रशासनिक भवन निर्माण गरिएको जानकारी दिएका छन्। सोही भवनबाट नगरपालिकाको सम्पूर्ण सेवा प्रवाह हुँदै आएको छ । उक्त प्रशासनिक भवनबाट सबै विषयगत शाखा, प्राविधिक, कार्यसमितिलगायत सेवा एउटै स्थानबाट सञ्चालन भइरहेको छ ।
मेयर यादवले नगरको दीर्घकालीन विकास र सेवाग्राहीलाई सहज सेवा उपलब्ध गराउने उद्देश्यले जग्गा दान गरेको बताएका छन् । उक्त भवन माधवनारायण नगरपालिकाले करिब रु ६ करोड र सहरी विकाश मन्त्रालयअन्तर्गत स्थानीय पूर्वाधार विभागबाट आधा अनुदान रु ६ करोडको लागतमा निर्माण सम्पन्न भएको नगरपालिकाका इन्जिनियर नागेन्द्र यादवको भनाई छ ।
नगरपालिकाका प्रमुख प्रशासकीय अधिकृत ऋषिकेश रेग्मीले नगरपालिकामा जनप्रतिनिधि र कर्मचारीबीच सहकार्य रहेको बताएका छन् । प्रशासनिक भवन आफ्नै पालिकाको हुँदा पालिकाको प्रशासनिक काम गर्न सहज हुने उनले बताएका छन्।
यसैबीच चन्द्रपुर नगरपालिकाको प्रशासनिक भवन नहुँदा काम कारबाहीमा समस्या आएको छ । गत भदौ २४ गते जेनजी आन्दोलनका क्रममा नगरपालिकाको भवन जलाइदिएपछि अहिले चन्द्रपुर नगरपालिकाकाको कामकाज भाडाको घरबाट जारी छ । भवन पुनःनिर्माणका लागि प्राविधिक काम भइरहेको नगर प्रमुख सञ्जयकुमार काफ्लेले बताए ।
प्रतिक्रिया