ग्वार्को चोरीमा संलग्न आरोपीको बैंक खातामा ३४ लाख भन्दा धेरै रकम मौज्दात

२७ पुस । ललितपुरको ग्वार्कोबाट मंसिर २७ मा दुई जना चोरीमा संलग्न मकवानपुर घर भएका ३७ वर्षीय वीर बहादुर वाइबा र ३७ वर्षका राम कृष्ण लोप्चनलाई प्रहरीले नियन्त्रणमा लिएको थियो ।
दुई जना मिलेर चोरी गर्ने उनीहरूलाई जिल्ला अदालत ललितपुरले पुर्पक्षका लागी थुनामा पठाउन आदेश गरेको छ । अदालतको आदेश अनुसार दुवै जनालाई कारागार चलान गरिएको जिल्ला प्रहरी परिसर ललितपुरले जनाएकाे छ ।
चोरीमा संलग्न कसुरमा पक्राउ गरेर अनुसन्धान गर्दा उनीहरूको खातामा लाखौँ रकम मौज्दात रहेको भेटिएको छ । मकवानपुरको इन्द्रसरोवर गाउँपालिका–३ स्थित सिस्नेरी घर भएर बालकुमारी बस्दै आएका वीर बहादुर बाइवाको खातामा ३४ लाखभन्दा बढी मौज्दात भेटिएको छ ।
एभरेस्ट बैंक लिमिटेड र ग्लोबल आइएमई बैंकमा बाइवाले सो रकम जम्मा गरेका हुन् ।
अस्वाभाविक रकम मौज्दात भेटिएपछि वीर बहादुरबारे थप अनुसन्धान गर्नुपर्ने भन्दै प्रहरीले सम्पत्ति शुद्धीकरण अनुसन्धान विभागलाई पत्राचार गरेको छ । ललितपुर महानगरपालिका–१५ स्थित मदन सिलवालको घरमा असोज ८ मा चोरी भएको थियो । सिलवालको घरबाट १५ लाख ९५ हजार बराबरको धनमाल वीर बहादुर र रामकृष्णले चोरी गरेको प्रहरीको अनुसन्धान निष्कर्ष छ ।