अध्यागमनका कर्मचारी र प्रहरीबीच कुटपिटबारे छानबिन गर्न समिति गठन

१२ माघ । अध्यागमनका कर्मचारी र प्रहरीबिच कुटपिट भएको घटना सार्वजनिक भएपछी कुटपिटबारे छानबिन गर्न समिति गठन गरिएको छ ।

गृह मन्त्रालयले सहसचिव थानेश्वर गौतमको संयोजकत्वमा छानबिन समिति गठन गरेको हो । समितिमा प्रहरी नायब महानिरीक्षक राजेशनाथ बास्तोला र सीमा तथा अध्यागमन प्रशासन शाखाका उपसचिव कुल बहादुर जि.सी. सदस्य रहेका छन् ।

घटनाबारे मन्त्रालयको गम्भीर ध्यानाकर्षण भएको गृह प्रवक्ता नारायणप्रसाद भट्टराईले जानकारी दिएका छन् । छानबिन समितिलाई ३ दिनमा प्रतिवेदन बुझाउन निर्देशन दिइएको छ ।