मेयर बालेन्द्र साहले बजेट संशोधन गरेपछि काठमाडौँ महानगरको बजेट पारित

काठमाडौँ
२५ असार । काठमाडौँ महानगरपालिकाको आगामी आर्थिक वर्ष २०८१÷८२ को वार्षिक नीति तथा कार्यक्रम र बजेट पारित भएको छ ।
मेयर बालेन्द्र साहले नीति तथा कार्यक्रम र बजेटलाई पेस गरेको संशोधन गरेर पेश गरेपछि राष्ट्रियसभा गृहमा बसेको आज बसेको १५औँ नगरसभाको पाँचौँ बैठकले पारित गरेको हो ।
बैठकमा नगरसभा सदस्यले नीति तथा कार्यक्रम र बजेट सर्वसम्मत पारित गरेका हुन् ।
बैठकमा नगरसदस्यले बजेटमाथि आ–आफ्नो धारणा राखेका थिए । नगरप्रमुख साहले नगरसदस्यको उठाएको विषय र सुझावलाई यथासम्भव समावेश हुने गरी बजेट र नीति तथा कार्यक्रम कार्यान्वयन गरिने विश्वास व्यक्त गरेका छन् ।

काठमाडौँ महानगरपालिकाले यही असार १० गते आर्थिक वर्ष २०८१÷८२ का लागि रु २५ अर्ब ७० करोड ६३ लाख २५ हजार बराबरको बजेट सार्वजनिक गरेको थियो । महानगरले पूर्वाधार विकास क्षेत्रका लागि सबैभन्दा धेरै रु १४ अर्ब ८१ करोड ५१ लाख ५१ हजार बजेट विनियोजन गरेको छ । जुन कूल बजेटको ६१ दशमलव २० प्रतिशत हो ।

कार्यालय सञ्चालन तथा प्रशासनिक क्षेत्रका लागि रु तीन अर्ब ४९ करोड ४५ लाख २९ हजार र सामाजिक विकास क्षेत्रका लागि रु तीन अर्ब ८१ करोड ३६ लाख १५ हजार बजेट प्रस्ताव गरिएको छ । सुशासन तथा अन्तर सम्बन्धित क्षेत्रका लागि रु एक अर्ब ८९ करोड २१ लाख र स्थानीय सञ्चित कोषबाट खर्च हुने गरी रकममध्ये आर्थिक विकास क्षेत्रअन्तर्गतका कार्यक्रमका लागि रु १९ करोड नौ लाख प्रस्ताव गरिएको छ ।