दक्षिण ललितपुरको उन्युचौर विद्युत सवस्टेशन अलपत्र, विद्युत आपूर्तिमा समस्या

ललितखबर

दक्षिण ललितपुरको कोञ्ज्योसोम ५ शंखुस्थित उन्युचौर विद्युत सवस्टेशन निर्माण पुरा भएपनि लामो समयदेखि अलपत्र बनेको छ ।
गतअसोज ११ र १२ गतेको बाढीले मकवानपुर इपा पञ्चकञ्यास्थित माण्डो जलविद्युतमा रहेको प्राधिकरणको सवस्टेशन बगाएपछि यस भेगमा विद्युत आपूर्ति समस्या भयो ।
विद्युत् आयोजनाले आफ्नोतर्फबाट सबै संरचना निर्माण गरे पनि प्राधिकरणले भने सवस्टेशन निर्माण सुरु गरेकै छैन । जसका कारण खानीखोला जलविद्युत् आयोजनाको विद्युत समेत जोड्न सकिएको छैन भने उन्युचौर सवस्टेशन समेत अलपत्र छ ।
सवस्टेशन बाढीले बगाउदा काठमाडौं निजगढ द्रुटमार्गको काममा विद्युत आपूर्ति अस्थायी तरिकाबाट मिलाइएको छ ।
प्राधिकरणका तत्कालिन प्रमुख कुलमान घिसिङले तत्काल टेण्डर प्रकृया सुरु नगरेको कारण सो आयोजना अलपत्र बनेको दक्षिण ललितपुर विद्युत सहकारीका अध्यक्ष गोविन्द बजगाई बताउछन् । भन्छन्, ‘नयाँ प्रमुख हितेन्द्रदेव शाक्य आएपछि अहिले काम सुरु भएको छ ।’
उन्युचौर सवस्टेशन चालु नहुँदा पछिल्लो समय लगनखेल वितरण केन्द्रलाई भार परेको बजगाई बताउछन् । पछिल्लो समय उपत्यकाबाहिरका लागि छुट्टै लाइन विस्तार गरिएको भए पनि मकवानुरको मिल्केसम्मै सो विद्युत् आपूर्ति गरिएका कारण अध्याधिक समस्या छ । अध्यक्ष बजगाईले भने, ‘उन्युचौर सवस्टेशन चालु नहुँदा मिल्केमा लाइन विग्रिए दक्षिण ललितपुर समेत अन्धकार हुन्छ ।’
प्राधिकरणले उपत्यकाबाट उन्युचौरसम्म विस्तार गरेको ११ केभि डबल सर्किट प्रशारण लाइन चार्ज गर्ने भएको छ ।
भोली मंगलबारदेखि सो प्रशारण लाइन चार्ज गरेर परिक्षण गर्न लागिएको हो ।