‘ललितपुरमा ६० प्रतिशत व्यावसाय दर्ता नै छैन’

हामी बजार अनुगमनमा गए व्यावसाय बन्द गरेर कारवाही गर्नुपछ । यसरी सबैको व्यावसाय बन्द गर्दै जाने हो भने अवस्था अर्कै आउँछ

ललितखबर
१६ बैशाख । ललितपुरमा दर्ता नै नगरि व्यावसाय गर्ने प्रबृत्ति बढेको भन्दै ललितपुर महानगरपालिकाकी उपमेयर मञ्जली शाक्यले असन्तुष्टि जनाएकी छिन् ।

जावलाखेलमा शनिबार ललितपुर महानगरले आयोजना गरेको सार्वजनिक सुनुवाई कार्यक्रममा सहभागीले महानगरको अनुगमन समितीकी संयोजक उपमेयर मञ्जली शाक्यको नेतृत्वमा बजार अनुगमन नगरेको र बजारमा कालो बजारी बढेको गुनासो गरेपछि शाक्यले विगतमा भएको अनुगमनका क्रममा ६० प्रतिशत हाराहारी बीना दर्ता व्यावसाय सञ्चालन गरेको पाइएको बताइन् ।

उनले भनिन्, ‘हामी बजार अनुगमनमा गए व्यावसाय बन्द गरेर कारवाही गर्नुपछ । यसरी सबैको व्यावसाय बन्द गर्दै जाने हो भने अवस्था अर्कै आउँछ । त्यसैले हामीले बजार अनुगमन गरेका छैनौं ।’
महानगरले व्यावसाय दर्ता अभियान सुरु गर्नुपर्ने अवस्था आएको उनको भनाई थियो ।

सहभागीले दशैंमा मात्रै बजार अनुगमन गर्नु पर्ने हो ? भन्दै प्रश्न गरेका थिए । सहभागीको दशैंमा मात्र बजार अनुगमन किन भएको भन्ने जिज्ञाशा थियो । उपमेयर शाक्यले दशैंमा मात्रै बजार अनुगमनको औचित्यबारे केही बोलिनन् ।