किरिया बसेको घरमा ग्यास विस्फोटपछि आगलागी, ११ घाइते

२९ असोज ०७७, ललितपुर । काठमाडौँको सोह्रखुट्टेस्थित नयाँ बजारको फलफूल चोकस्थित निलकुमारी क्षेत्रीको घरमा ग्यास सिलिण्डर विस्फोट हुँदा ११ जना घाइते भएका छन् ।
निलकुमारीका श्रीमान्को हिजो मात्रै निधन भएको र परिवार किरियामा बसेका बेलामा विस्फोट भएको जनाइएको छ ।
विस्फोटपछि आगलागी भएको थियो । दमकलको सहायतामा प्रहरीले आगो निभाएको थियो । महानगरीय प्रहरी परिसर काठमाडौँका प्रमुख प्रहरी वरिष्ठ उपरीक्षक श्यामलाल ज्ञवालीका अनुसार आज घटना घटेको हो । विस्फोटबाट घरको भौतिक संरचना नै भत्किएको ज्ञावालीले जानकरी दिए । यस घटनाका कारण वरिपरीका घरमा समेत क्षति पुगेको जनाइएको छ ।
घटनामा ठूलो भौतिक क्षति भएको महानगरीय प्रहरी कार्यालय रानीपोखरीका प्रमुख प्रहरी नायब महानिरीक्षक विश्वराज पोखरेलले जानकारी दिएका छन् । घाइतेमध्ये तीन जनाको मनमोहन अस्पताल ठमेल र तीन जनाको महाराजगञ्जस्थित शिक्षण अस्पतालमा उपचार भइरहेको प्रहरीले जनाएको छ ।
निलकुमारी क्षेत्रीको घरमा विस्फोट भएको हो । उहाँका श्रीमान्को हिजो मात्रै निधन भएको थियो । परिवार किरियामा बसेका बेलामा विस्फोट भएको जनाइएको छ । चारतले घरको दोस्रो तलामा ग्यास चुहिएपछि विस्फोट भएको प्रारम्भिक अनुसन्धानमा देखिएको र घटनाको थप अनुसन्धान भइरहेको प्रहरीले जनाएको छ ।