जावलाखेल प्रशिक्षण केन्द्रमा कभर्डहलको शिलान्यास

३० मंसिर ०७७, जावलाखेल । ललितपुरको जावलाखेलस्थित भलिबल प्रशिक्षण केन्द्रमा कभर्डहलको शिलान्यास गरिएको छ । आज (मंगलबर)ललितपुर महानगरपालिका–४ का अध्यक्ष नारायण केसी, वडा नम्बर १३ का अध्यक्ष गणेश केसी तथा प्रशिक्षण केन्द्रका अध्यक्ष माधव खड्काले संयुक्तरुपमा कभर्डहलको शिलान्यास गरेका हुन् । यस कभर्डहल वाग्मती प्रदेश सरकारको आर्थिक सहयोगमा बन्न लागेको हो ।
कभर्डहल पाँच महिनाभित्र निर्माण सम्पन्न गर्ने लक्ष्य रहेको प्रशिक्षण केन्द्रका अध्यक्ष खड्काले जानकारी दिए । राष्ट्रियस्तरका भलिबल खेलाडी उत्पादन गर्ने उद्देश्यका साथ कभर्डहल निर्माण गर्न लागिएको उनले बताएका छन् । कभर्डहल निर्माण गर्न वाग्मती प्रदेश सरकारले रु दुई करोड ४७ लाख बजेट विनियोजन गरेको छ । शिलान्यास कार्यक्रममा राष्ट्रिय खेलकूद परिषद् (राखेप)का बोर्ड सदस्य इन्दिरा निरौला, प्रशिक्षक कपिलकिशोर श्रेष्ठलगायत पदाधिकारीको उपस्थिति रहेको थियो ।