बल्खुमा भ्यानको ठक्करबाट पैदलयात्रीको मृत्यु, ट्राफिक प्रहरी घाइते

११ पुस ०७७, ललितपुर । बल्खुमा भ्यानको ठक्करबाट पैदलयात्रीको मृत्यु भएको छ भने प्रहरी जवान घाइते भएका छन् ।
शुक्रबारराति ट्राफिक जाँचका क्रममा भ्यान भाग्न खोज्दा बल्खु चोकमा दुर्घटना भएको प्रहरीले जनाएको छ । भ्यानको ठक्करबाट पैदलयात्री काठमाडौं कीर्तिपुर बस्ने गोरखाका ५४ वर्षका काले आलेमगरको मृत्यु भएको हो । गम्भीर घाइते मगरको उपचारका क्रममा मृत्यु भएको प्रहरीले जनाएको छ ।

बा १६ च २९१५ नम्बरको भ्यानले ट्राफिक जाँचमा रहेका ट्राफिक जवानलाई ठक्कर दिएर भाग्ने क्रममा पैदलयात्रीलाई ठक्कर दिन पुगेको थियो । भ्यानको ठक्करबाट बल्खुमा कार्यरत प्रहरी जवान २३ वर्षका मानबहादुर साउद घाइते भएका छन् । उनको बयोधा अस्पतालमा उपचार भइरहेको छ । भ्यान चालक भने फरार रहेका छन् । उनको खोजी भइरहेको प्रहरीले जनाएको छ ।