उद्घाटनको महिना दिन नपुग्दै चुहिन थाल्यो गोदाबरी सन्राइज सम्मेलन केन्द्र

३१ जेठ ०७८, ललितपुर । अन्तर्राष्ट्रियस्तरको गोदाबरी सन्राइज सम्मेलन केन्द्र उद्घाटनको महिना दिन नपुग्दै पानी चुहिन थालेको छ । निरन्तर रूपमा छतबाट पानी चुहिन थालेपछि फलसिलिङ फुल्न थालेको छ । केन्द्रको छत जस्तापाताले छाएको छ । पानी चुहिएर बिग्रिन थालेपछि सभाहल छिर्ने ढोकामाथि रहेको फलसिलिङ भत्काएर मर्मतको काम भइरहेको छ । मर्मत नभएको ठाउँ–ठाउँमा पानी चुहिएको छ ।

प्रधानमन्त्री केपी शर्मा ओलीले गत ३१ वैशाखमा सरकारीनिवास बालुवाटारबाट स्विच थिचेर भर्चुअल रूपमा अन्तर्राष्ट्रिय सम्मेलन केन्द्रको उद्घाटन गरेका थिए । ओलीले आफ्नो कार्यकालमा बनेका भौतिक संरचनाका साथै विकास निर्माण हतार–हतार उद्घाटन गर्ने क्रममै अन्तर्राष्ट्रिय सम्मेलन केन्द्रको निर्माण सम्पन्न नभई उद्घाटन गरिएको थियो । सम्मेलन केन्द्रमा अहिले पनि निर्माणको काम जारी छ ।
सहरी विकास मन्त्रालय मन्त्रालयअन्तर्गत सहरी विकास तथा भवन निर्माण विभागले टेन्डर गरेर सम्मेलन केन्द्र निर्माणको काम गरेको थियो ।