टोखामा टिपर दुर्घटनापछि २ जनाको मृत्यु, १ जना घाइते

२० असार ०७८, काठमाडौं । काठमाडौंको टोखामा टिपर दुर्घटनापछि २ जनाको मृत्यु भएको छ । काठमाडौं प्रहरीका अनुसार काठमाडौं टोखा नगरपालिका ९ दिपज्योतीस्थित सडकमा बा.२ क ३४६६ नम्बरको टिपरले प्रदेश–०३–०२–०१० प ७२२१ नम्बरको मोटरसाइकललाई शनिबार राति ठक्कर दिँदा २ जनाको घटनास्थलमै मृत्यु भएको हो ।
मृत्यु हुनेहरुमा मोटरसाइकल चालक टोखा नगरपालिका ९ बानियाटार डेरा गरी बस्ने नुवाकोट बेलकोट नगरपालिका ६ घर भएका २६ वर्षीय सन्तोष अधिकारी र मोटरसाइकलमा सवार २२ वर्षीय दिपेश थापा रहेका छन् ।
दुर्घटनामा घाइते भएका मोटरसाइकलमा सवार सोही ठाउँ बस्ने ३० वर्षीय सागर खतिवडाको शिक्षण अस्पताल महाराजगंजमा उपचार भइरहेको छ । टिपर चालकलाई प्रहरीले नियन्त्रणमा लिएर कानूनी प्रकृया सुरु गरेको जानकारी दिएको छ ।