बबरमहलकी घरबेटी प्रधानले दिइन् रूपा सुनारविरूद्ध जाहेरी

२७ असार ०७८, काठमाडौं । जातीय भेदभावको आरोप लागेकी काठमाडौं बबरमहलकी सरस्वती प्रधानले तनहुँकी रूपा सुनारविरूद्ध प्रहरी कार्यालयमा जाहेरी दिएकी छन्।
आइतबार दिउँसो महानगरीय प्रहरी वृत्त सिंहदरबार पुगेर प्रधानले रूपाविरूद्ध जाहेरी दिएकी हुन् ।
उनले आफ्नो बेइज्जति गरेको, अफवाह फैलाएको लगायतमा जाहेरी दिएकी छन् ।

कोठा माग्न जाँदा थरकै कारण नदिएको भन्दै रूपाले प्रधानविरूद्ध असार १ गते जातीय भेदभावको कसुरमा जाहेरी दिएकी थिइन्। जाहेरीपछि प्रधानलाई प्रहरीले पक्राउ गरी तीन दिन हिरासतमा राखेर अनुसन्धान अघि बढाएको थियो।

प्रहरीले अनुसन्धान सकाएर काठमाडौंको सरकारी वकिल कार्यालय बुझाएको थियो। कार्यालयले त्यस प्रतिवेदनमाथि थप अनुसन्धान गर्नू भन्ने आदेश दिएपछि सरस्वती प्रधान उनका श्रीमान् मुकुन्दको रोहवरमा छुटेकी थिइन्।

प्रधानले आफूले रूपामाथि कुनै विभेद नगरेको बताउँदै आएकी छन्।