चापागाँउमा कमलको फूलमा कला भर्दै चित्रकार

ललितपुर खबर
१० साउन ०७८, चापागाँउ । केही दिनअघि ललितपुर खबरमा प्रकाशित सुन्दर कमलको फूलहरु देखेर कलाकारहरु चित्र कोर्न चापागाँउ कमलपोखरी ‘पल्सवा पुखु’ आए । राजधानीको बानेश्वर, शंखमुल र नख्खुलगायत ठाँउबाट कलाकारहरु आएर सुन्दर चित्रकला बनाएका हुन् ।
योङ्ग पिकासो आर्ट स्कूलका आयोजना र झ्यालीपाटी योग साधना केन्द्रको सहयोगमा दर्जनभन्दा धेरै कलाकारले कमलका सुन्दर चित्र बनाएका हुन् । योङ्ग पिकासो आर्ट स्कूलका शिक्षक अजय देशारले स्थानीय कला र पर्यटन प्रवद्र्धनमा सहयोग पु¥याउन लाइभ आर्ट सेसन सुरु गरिएको बताए ।

भने, हाम्रो ठाँउमा यस्ता सुन्दर ठाँउ छन् भने प्रचार गर्न कलाको माध्यम सशक्त हुन्छ । हामी यी चित्रहरु प्रर्दशनीमा राखेर प्रचार गर्नेछांैं । कलाकार तथा शिक्षक देशारले कारोना संक्रमणपछि कला यात्रा मार्फत प्रचारमा लागेको बताए ।
कोरोना संक्रमणको त्रासपछि कला यात्रामा निस्किन पाउदा आफूलाई खुशी लागेको कलाकार मिरा जोशी प्रधानले बताइन् । उनले भनिन्, ‘कला प्रेमीलाई मन पर्ने कमलको फुलै फुल फुलेको रमाइलो ठाँउ रहेछ ।’

झ्यालीपाटी योग साधना केन्द्रका अध्यक्ष दयाराम महर्जनले धेरै ठाँउ डुलेर कमलको फूल रोपेको बताए । उनले भने, हामी यो पोखरी वरपर पार्कसहित बगैचा बनाउदै छौं । २५ वर्षअघि यस पोखरीमा सुन्दर फुल फुल्थे । स्थानीय युवाहरु मिलेर जग्गा संरक्षणसँगै कमलको फूल फुलाउन सफल भएको उनले बताए । यस पोखरीमा रंगीन माछा राखिएको छ ।

कमल पोखरी नजिक व्याट्मिन्टन कोर्ट समेत छ । सँगै योगसाधना केन्द्र समेत रहेकाले विहान बेलुका कमलपोखरी डुल्न युवा युवा युवती आउछन् ।

नजिकै रहेको धापाखेलस्थित नागदहमा समते कमलको फूल्ने गर्दछ । तर संरक्षणको अभावमा फूल हराउने गरेको छ ।
यस पोखरीमा बाल बच्चाहरुलाई डुवाएर तर्साउदा सातो आउने जनविश्वास छ । पागल वनको नजिक रहेको पोखरीमा रंगी विरंगी चरा चुरुगी आउछन् ।