भट्टेडाँडाको भीरबाट मोटरसाइकल खस्यो, १ जनाको मृत्यु १ घाइते

२३ साउन ०७८,ललितपुर । दक्षिण ललितपुरको भट्टेडाँडा नजिकै मोटरसाइकल दुर्घटनामा परेर एक जनाको मृत्यु भएको छ भने अर्का एक पुरुष घाइते भएका छन् ।
इलाका प्रहरी कार्यालय भट्टेडाँडाका अनुसार बाग्मती गाउँपालिका ३ भट्टेडाँडाको मासखोलामा आज शनिबार बा ४५ प ४९०६ नम्बरको मोटरसाइकल दुर्घटनामा कलङ्की बस्ने ४८ वर्षीय निरज खनालको मृत्यु भएको हो । उनका अनुसार सोही मोटरसाइकलमा रहेका धोविघाट निवासी ४७ वर्षीय निरन्जन सिंह हमाल घाईते भएका छन् । दुर्घटना विहान रातको समय करिव ३ बजेतिर भएको बताइएको छ ।
स्थानीयबासीले सडक किनारामा मोटरसाइकल ढलेको अवस्थामा देखेपछि पहरामा खोज्दा उनीहरु लडिरहेको अवस्थामा फेला परेको प्रहरी कार्यालयका हवल्दार जयबहादुर खड्काले बताए । उनले भने,‘हामीलाई नजिकै रहेको चेकपोष्टमा हेटौडा जाने गाडीमा सवार व्यक्तिहरुले जानकारी गराएपछि उद्दार गरि अस्पताल पठाइएको हो ।’
घाईतेलाई उपचारको लागि पाटन अस्पताल ल्याईएको छ । घाइते हमाल बोल्न सक्ने अवस्थामा रहेको उनले बताए ।
काठमाडौँबाट कान्ति लोकपथ हुँदै हेटौडा जाँदै गरेको मोटरसाईकल मासखोलामा पुगेर सडकभन्दा २०० मिटर तल लडेको थियो । दक्षिण ललितपुरको पहाडको यो सडकमा निरन्तर दुर्घटना हुँदै आएको छ । मृत्युपछि खनालको शव पोष्टमार्टमका लागि पाटन अस्पताल लगिएको प्रहरीले जानकारी दिएको छ ।