काठमाडौं महानगर र सिसडोलबासीबीच सहमती, आजबाट फोहोर उठ्ने

काठमाडौं महानगरपालिका र सिसडोलका स्थानीयबीच आज भएको १४ बुँदे सहमतिअनुसार फोहोर व्यवस्थापनको अवरोध हटाई उपत्यकामा रहेको फोहोरलाई सिसडोलमा व्यवस्थापन गर्ने सहमति भएको हो ।
महागरको वातावरण व्यवस्था विभागका प्रमुख हरिकुमार श्रेष्ठ र ककनी वडा– १ का वडा अध्यक्ष चन्द्रबहादुर श्रेष्ठसहित संलग्न बैठकले विभिन्न १४ बुँदे सहमतिमा गर्दै फोहोर ढुवानीमा भएको अवरोध हटाउँदै फोहोर व्यवस्थापन गर्ने निर्णय भएको हो । सहमतिअनुसार अब स्थानीयले फोहोर ढुवानीमा अवरोध सिर्जना गर्नेछैनन् र उपत्यकाको फोहोर व्यवस्थापन हुनेछ ।
दुवै पक्षले सहमति आजैदेखि लागू गर्ने जनाएका छन् । यसअघि महानगरपालिकासँग गरिएको १७ बुँदे सम्झौता पनि कार्यान्वयन गर्ने सहमति भएको प्रमुख श्रेष्ठ बताए ।
सहमतिमा तीनपिप्ले–सिसडोल सडक तत्काल १५ दिनभित्रमा ग्राभेल गरिने र त्यसपश्चात् टेण्डर प्रक्रियामा गई कालोपत्र गरिने, फोहोर ढुवानी गर्ने गाडीको लिचेड बक्सको व्यवस्था गर्नुपर्ने र तीनपिप्ले–सिसडोल सडक खण्डमा पार्किङ गर्न नपाउने तथा ओभरलोड ढुवानी गर्न नदिने, फोहोर ढुवानी गर्ने गाडीलाई टाइम कार्ड र बिहान ४ बजेदेखि दिउँसो ४ बजेसम्मको समयमा मात्र आउजाउ गर्न दिने, बाटोमा खसेको फोहोरलाई व्यवस्थापन गर्न गाडीको व्यवस्थापन गर्ने बुँदा रहेका छन् ।
यस्तै, तीनपिप्ले–सिसडोल सडक खण्डको जग्गाको कित्ताकाट गरि मुआब्जा दिने सम्बन्धमा महानगरका प्रमुखसँग छलफल गर्ने, स्थानीय प्रभावित क्षेत्रमा रहेका विद्यालय र संघसंस्थाका लागि खेलकुद व्यवस्थापन गर्ने, श्री महालक्ष्मी मन्दिर क्षेत्रमा सार्वजनिक शौचालय बनाउनेसमेत सहमति गरिएको छ ।
तीनपिप्ले–सिसडोल सडक खण्ड छेउछाउ र महालक्ष्मी मन्दिर वरपर वृक्षरोपण गरिने, फोहोर ढुवानी गर्ने चालकका लागि स्वास्थ्य परीक्षण गर्ने, सडक संरक्षण र सरसफाइका लागि अभियान संचालन गर्नेसमेत सहमति भएको छ ।