ललितपुरको सातदोवाटोबाट सुन चोरी

२७ भदौं ०७८, ललितपुर । शनिबार साँझ ललितपुरको सातदोवाटोबाट सुनको गरगहना चोरी भएको छ ।
प्रहरीका अनुसार ललितपुर महानगरपालिका १५ सातदोबाटो बोधिग्राम बस्ने दिनेश महर्जनको घरबाट करिब १० लाख १५ हजार रुपैयाँ बराबरको विभिन्न सुनका गहना तथा नगद शनिबार साँझ चोरी भएको हो ।
उनको घरको कोठाको ताल्चा फोडी सुनका विभिन्न गर–गहना र नगद समेत चोरी भएको प्रहरीको भनाई छ । चोरीपछि फरार भएको भन्ने खबर प्राप्त हुनासाथ महानगरीय प्रहरी वृत्त सातदोबाटोबाट खटिएको प्रहरीले चोरीमा संलग्न हाल फरार व्यक्तिहरुको खोजी गर्नुका साथै आवश्यक अनुसन्धान गरिरहेको जानकारी दिएको छ ।