काठमाडौंको गोठाटारबाट तिहारका लागि ल्याइएका पटका वरामद एक जना पक्राउ

१७ असोज ०७८,काठमाडौं । अवैध रुपमा करिब २५ लाख रुपैयाँ मूल्य बराबरका पटाका, आतिषबाजीजन्य पदार्थको भण्डारण गर्ने कार्यमा संलग्न रहेको अभियोगमा कागेश्वरी मनहरा नगरपालिका ८ गोठाटार जलविनायक चोक बस्ने सर्लाही रामनगर गाउँपालिका १ घर भएका ३० वर्षीय कामेश्वर प्रसाद यादवलाई शनिबार प्रहरीले पक्राउ गरेको छ ।
प्रहरीका अनुसार बिभिन्न मितिमा उपत्यका बाहिरबाट गैरकानुनी रुपमा पटाका, भुईचम्पा लगायतका आतिषबाजीजन्य विस्फोटक पदार्थहरु विजयादशमी र दिपावलीलाई लक्षित गरी भण्डारण गरेको अभियोगमा महानगरीय अपराध महाशाखा मिनभवनबाट खटिएको प्रहरीले जलविनायक चोकस्थित उनकै कवाडी पसलको गोदाम तलासी गर्दा उक्त विस्फोटक पदार्थ फेला पारी उनलाई पक्राउ गरेको हो ।
प्रहरीले उनको गोदामबाट २५ केजी गमला पटाका, ४ सय २० केजी स्पेशल फ्लावरकोन पटाका, ५४ केजी हाईड्रो फोईल्स पटाका, १ हजार ९२ केजी झ्यारझ्यारे पटाका, १५ केजी रोल क्यापस पटाका, १ सय २० केजी ग्राउण्ड चक्र पटाका, ९६ केजी स्पाइनर पटाका, ७५ केजी हाईड्रो बम पटाका, १ सय २० केजी अन्य विभिन्न किसिमको पटाका, नगद ९० हजार रुपैयाँ र १ थान मोबाइल बरामद गरेको जानकारी दिएको छ ।
उनलाई विस्फोटक पदार्थ सम्बन्धि कसूर अन्तर्गतको मुद्दामा आवश्यक कारवाहीको लागि महानगरीय प्रहरी परिसर टेकु काठमाडौं पठाईएको महाशाखाले जिानकारी लएको छ ।