हुण्डीको कारोवारको आधारमा भक्तपुरबाट एक युवक ८० लाखसहित पक्राउ

४ कात्तिक ०७८, भक्तपुर । मध्यपुर ठिमी नगरपालिका १ लोकन्थलीबाट स्रोत नखुलेको ८० लाख रूपैयाँ सहित एक युवकलाई प्रहरीले पक्राउ गरेको छ । प्रहरीका अनुसार काठमाडौं कोटेश्वर बस्ने बाग्लुङ गल्कोट नगरपालिका १० पाण्डवखानी घर भएका ३६ वर्षीय चित्र बहादुर पुन मगरलाई बुधबार राति प्रहरीले पक्राउ गरेको हो ।
लोकन्थली मनहरा आँखा अस्पताल नजिक हुण्डीको कारोवार भईरहेको सूचनाका आधारमा महानगरीय प्रहरी वृत्त ठिमीबाट खटिएको प्रहरीले मगरलाई बा.४९ प ८५६५ नम्बरको स्कुटर र नगद ३० लाख रूपैयाँ सहित नियन्त्रणमा लिई अनुसन्धानको क्रममा उनको कोठा तलासी गर्दा थप नगद ५० लाख रूपैयाँ फेला पारेको प्रहरीको भनाई छ ।
उनलाई आवश्यक कारवाहीको लागि सम्पत्ति शुद्धिकरण बिभाग हरिहरभवन ललितपुर पठाइएको महानगरीय प्रहरी परिसर भक्तपुरले जानकारी दिएको छ ।