आरआर क्याम्पसका शिक्षकमाथि कुटपिट

६ पुस ०७८, काठमाडौं । चिट चोर्न नदिएकाे भन्दै प्रदर्शनी मार्ग स्थित रत्नराज्यललक्ष्मी क्याम्पसका सहायक क्याम्पस प्रमुख प्रकाश पुडासैनीमाथि विद्यार्थी कुवेर जेठाराले कुटपिट  गरेका छन् ।

चिट चोरिरहेको फेला पारेपछि गार्ड बसेका शिक्षकले विद्यार्थी कुवेर जेठारालाई परीक्षा हलबाट बाहिर निकालेका थिए ।

परीक्षा सकिएपछि विद्यार्थी जेठाराले आफ्ना अन्य साथीहरूलाई क्याम्पसमा बोलाएका थिए । विवाद भएपछि शिक्षक तथा विद्यार्थीबीच सहायक क्याम्पस प्रमुखको कोठामा छलफल पनि गरिएको थियो ।

छलफलकै क्रममा विद्यार्थी जेठाराले सहायक क्याम्पस प्रमुख प्रकाश पुडासैनीमाथि पानी पिउन प्रयोग हुने स्टिलको जगले शिक्षक पुडासैनीको टाउकोमा प्रहार गरी घाइते बनाएका छन् ।

घाइते पुडासैनीलाई उपचारका लागि नजिकको मोडल अस्पताल लगिएको छ । उनको टाउकोमा सात वटा टाँका लगाइएको छ भने विवादपछि परीक्षा स्थगित गरिएको छ ।