मंगलबजारमा आज एमाले जिल्ला अधिवेशनको उद्घाटन

२३ पुस ०७८, ललितपुर । नेकपा एमालेले जिल्ला अधिवेशन आज हुँदैछ । एमालेका अनुसार ललितपुरको मंगलबजारमा हुने उद्घाटन कार्यक्रममा एमाले महासचिव शंकर पोखरेलले उद्घाटन गर्दैछन् ।
कार्यक्रमको सबै तयारी पुरा भएको पार्टी सचिव पुरुषोत्तम आर्चायले जानकारी दिएका छन् । उनका अनुसार मंगलबजारमा आज २० हजार कार्यकर्ता सहभागी हुँदैछन् ।
पार्टीले हरेक वडाबाट कम्तिमा १ सय जना कार्यकर्तालाई कार्यक्रममा सहभागी गराउन सर्कुलर जारी गरेको छ ।
नेकपा (एमाले)ले आज देशभर जिल्ला अधिवेशन गर्दैछ । प्रतिकूल मौसमका कारण केही हिमाली जिल्ला र तयारी नपुगेका बाहेक जिल्लामा भने अधिवेशनको अर्काे मिति तय हुनेछ ।
एमालेका अध्यक्ष केपी ओलीले बिहान ११ बजे जिल्ला अधिवेशनलाई भर्चुअल माध्यमबाट सम्बोधन गर्नेछन् । केन्द्रीय कार्यालयको एक्सन रूमबाट एकैसाथ भर्चुअल उद्घाटन र सम्बोधन गर्ने कार्यक्रम रहेको केन्द्रीय प्रचार विभाग उपप्रमुख विष्णु रिजालले जानकारी दिए ।
एमालेको १०औं महाधिवेशन गत मंसिरमै सकिए पनि जिल्ला अधिवेशन एकसाथ उद्घाटन हुन लागेको हो ।
जिल्ला तहमा पनि सकेसम्म सर्वसम्मत नेतृत्व चयनका लागि पहल गर्न केन्द्रले निर्देशन दिएको छ । जिल्ला तथा प्रदेश अधिवेशनका लागि दशौं राष्ट्रिय महाधिवेशनको लागि निर्धारण गरिएका पार्टी सदस्यलाई नै आधार बनाउन एमालेले सर्कुलर गरेको छ ।

जिल्ला अधिवेशन सकिए लगत्तै प्रदेश सम्पर्क कमिटी र प्रदेश संगठन कमिटीको अधिवेशनको तयारी थाल्ने एमालेले जनाएको छ । एमालेको प्रदेश अधिवेशन भने माघ ८ गतेका लागि तोकिएको छ ।