काठमाडौंको सुविधानगर र विजुली बजारमा दुर्घटना २ जनाको मृत्यु

२६ पुस ०७८, काठमाडौं । काठमाडौंको सुविधानगर र विजुली बजारमा भएको दुर्घटनाका कारण २ जनाको मृत्यु भएको छ ।
प्रहरीका अनुसार काठमाडौं महानगरपालिका १० बानेश्वरस्थित सडकमा बागमती प्रदेश ०२–०३१ प ७५६२ नम्बरको मोटरसाइकलको ठक्करबाट पैदलयात्री काठमाडौं महानगरपालिका ३२ सुविधानगर बस्ने रामेछाप घर भएका ६३ वर्षीय जिवनाथ गौतमको आइतबार साँझ मृत्यु भएको हो ।
ठक्करबाट गम्भीर घाइते भएका उनको मिनभवनस्थित सिभिल अस्पतालमा उपचारको क्रममा मृत्यु भएकोे प्रहरीको भनाई छ । घाइते भएका मोटरसाइकल चालकलाई सोही अस्पताल हुँदै थप उपचारको लागि ट्रमा सेन्टर पठाइएको छ ।
यसैगरी काठमाडौं महानगरपालिका १० विजुली बजारस्थित सडकमा हाल नम्बर नखुलेको टिपरको ठक्करबाट भक्तपुर व्यासी बस्ने कालिकोट पचालझरना गाउँपालिका २ घर भएका २२ वर्षीय विपिन विकको आइतबार राति मृत्यु भएको छ ।
प्रहरीका अनुसार यसै ठाउँस्थित रोधी घरमा मादक पदार्थ सेवन गरी झगडा गरी भाग्ने क्रममा टिपरले ठक्कर दिँदा गम्भीर घाइते भएका उनको बानेश्वरस्थित सिभिल अस्पतालमा उपचारको क्रममा मृत्यु भएको हो ।
झगडामा संलग्न ४ जनालाई नियन्त्रणमा लिनुका साथै फरार १ जना तथा सवारी साधनको प्रहरीले खोजी गरिरहेको छ ।
दुर्घटनाका सम्बन्धमा प्रहरीले थप अनुसन्धान गरिरहेका जानकारी दिएकोे छ ।