महालक्ष्मीमा निर्वाचन लक्षित बुद्धिजिवी युवा परिषद गठन

२४ फागुन ०७८, ललितपुर । आगामी बैशाख ३० गते हुन गईरहेको स्थानिय तहको निर्वाचनलाई लक्षित गरेर महालक्ष्मी नगरपालिकाभित्र बुद्धिजिवी युवा परिषदको गठन भएको छ । महालक्ष्मी नगर वडा नं १ कमिटिले चुनाब लक्षित कार्यक्रमलाई नगरभित्र सक्रिय बनाउन महालक्ष्मीभित्रका बुद्धिजिवी युवाहरुलाई समेटेर ‘बुद्धिजिवी परिषद’ गठन गरेको हो ।
मंगलबार ११२ औ अन्तर्राष्ट्रिय श्रमिक महिला दिवसको अवसर पारेर बुद्धिजिवी भेला कार्यक्रम २०७८ का क्रममा सो परिषदको गठन गरिएको हो ।
नवगठित बुद्धिजिवी युवा परिषदमा समेटिएका महालक्ष्मी वडा नं १ का बुद्धिजिवी युवाहरुलाई महालक्ष्मी नगरपालिका नगरप्रमुख रामेश्वर श्रेष्ठले खादा लगाएर सम्मान गरेका थिए । नगरप्रमुख श्रेष्ठले महालक्ष्मीका १ नं वडालगायत १० ओटै वडामा बुद्धिजिवी युवा परिषद गठन गरेर सक्रिय बनाउँदै लैजाने जानकारी दिए ।
कार्यक्रममा नगरप्रमुख श्रेष्ठले नगरभित्रका नगरबासीहरुलाई रोशी खोलाको शुद्ध पानी खुवाउँने लक्ष्य रहेपनि बर्तमान सरकारले बजेट कटौती गर्दै गरेको गुनासो गरे । ‘एमालेलाई चारैतिरबाट प्रहार गरिएको छ’ उनले भने, ‘यस्का लागि युवा वर्ग,बुद्धिजिवी वर्ग र महिला वर्गले पार्टीलाई सहयोग पुर्याउन अनुरोध छ ।’
कार्यक्रममा एमाले महालक्ष्मी नगर ईन्चार्ज तथा वडा नं ५ का अध्यक्ष राजकुमार सिलवाल, नगर अध्यक्ष हरिगोविन्द श्रेष्ठ, अनेमसंघकी नगर अध्यक्ष आशा राई, युवा संघका नगर अध्यक्ष सुजिब बस्नेतलगायतले शुभकामना व्यक्त गरेका थिए ।
कार्यक्रममा वडा नं ५ का वडा अध्यक्ष राजकुमार शिलवाललाई सम्मान गरिएको थियो ।