छैटौँ औद्योगिक सांस्कृतिक पर्यटन तथा व्यापार मेला भक्तपुरमा

१० चैत्र ०७८, काठमाडौं ।छैटौँ औद्योगिक साँस्कृतिक पर्यटन तथा व्यापार मेला २०७८–०७९ भक्तपुरमा हुने भएको छ । मेला सल्लाघारी तीनकुनेमा हुनेछ । ‘औद्योगिक शान्ति नेपाल संस्था’ र मध्यपुर ब्वाइज व्याण्डको संयुक्त आयोजनामा मेला हुन लागेको हो । ‘नयाँ वर्ष नयाँ सोच युवाको लागि छ प्रगतिको स्रोत’ नाराका साथ २४ चैतदेखि ४ वैशाखसम्म मेला हुन लागेको हो । मेलाका लागि आवश्यक प्रक्रिया पूरा गरिसकेको आयोजक औद्योगिक शान्ति नेपाल संस्थाका अध्यक्ष सन्दीप महतले बताए ।

उनले अब तत्कालै यस क्षेत्रमा स्टल निर्माण कार्यका लागि तयारीमा जुटिसकेको जनाए ।मेलामा २०० भन्दा बढी स्टल राखिने जनाइयो । स्टलको साइज अनुसार कम्तीमा ६ हजारदेखि १९ हजार ५०० सम्म शुल्क लिएर स्थानीय व्यापारीलाईसमेत स्टल उपलब्ध गराइने जनाइयो । मेलामा करिब ३ लाख भन्दा बढी उपभोक्ताको आगमन हुने अनुमान गरिएको छ । करिब ८ करोडको कारोबार हुने अपेक्षा गरिएको छ ।