मध्यपुरथिमि ५ र ६ मा कांग्रेस विजयी

३ जेठ ०७९, मध्यपुरथिमि । भक्तपुरस्थित मध्यपुरथिमि नगरपालिका ५ र ६ मा कांग्रेस र माओवादी केन्द्रबीचको गठबन्धनका उम्मेदवार विजयी भएका छन् । गए राति सम्पन्न मतगणनाको परिणामअनुसार मध्यपुरथिमि ५ मा कांग्रेसका बालकृष्ण श्रेष्ठ र वडा नं ६ मा ज्ञानदास प्रजापति वडाध्यक्षमा निर्वाचित भएको छन् । नवनिर्वाचित कांग्रेसका श्रेष्ठले दुई हजार ३६२ मत ल्याए भने उनका निकटम प्रतिद्वन्द्वी एमालेका राधेश्याम प्रजापतिले एक हजार ३सय ९३ मत प्राप्त गरे ।
वडा नं ५ को वडा सदस्यमध्ये महिला सदस्यमा एमालेका कमला प्रजापति एक हजार ५ सय ८८, खुला सदस्यमा कांग्रेसका राजभाइ प्रजापति एक हजार ९ सय ३० र एमालेका सुरेन्द्र भासिमा एक हजार ९ सय २१ मतका साथ निर्वाचित हुनुभयो । यहाँ दलित महिला सदस्यमा कांग्रेसका उम्मेदवार निर्विरोध निर्वाचित भएका थिए ।
त्यस्तै वडा नं ६ मा गठबन्धनको प्यानलै विजयी भएको छ । वडाध्यक्षमा कांग्रेसका ज्ञानदास प्रजापति एक हजार ७ सय २३ मत ल्याइ विजयी भए । उनका निकटम प्रतिद्वन्द्वी एमालेका उम्मेदवारले एक हजार २९ मत ल्याए । वडा सदस्यमा कांग्रेसका अरुणा नकर्मी एक हजार ६ सय ४५, रामचन्द्र थापामगर एक हजार ३ सय ७०, दलित महिला सदस्यमा सीता विश्वकर्मा एक हजार ७ सय १५ र एक सदस्यमा माओवादीका तुलसीराम प्रजापति एक हजार १ सय ६४ मतका साथ निर्वाचित भएका छन् ।
मध्यपुरथिमि नगरपालिकामा नेपाली कांग्रेस र नेकपा (माओवादी केन्द्र)बीचको गठबन्धनले फराकिलो अग्रता बनाएको छ । मध्यपुरथिमि नगरपालिकाको नौवटा वडामध्ये हालसम्म छ वडाको मतगणना सकिएको छ । नगरको तीन वडाको मतगणना बाँकी छँदै गठबन्धनले फराकिलो अग्रता बनाएको हो ।
मध्यपुरथिमिमा कूल खसेको ३१ हजार ४ सय १० मतमध्ये वडा नं १ देखि ६ सम्मको २२ हजार मतगणना भइसकेको छ । अब गणना गर्न बाँकी करिब ११ हजार मत छ । वडा नं ६ सम्मको मतगणनामा गठबन्धनका नगर प्रमुख उम्मेदवार कांग्रेसका सुरेन्द्र श्रेष्ठले तीन हजार ४९८ मतको अग्रता लिएका छन् । उनको ११ हजार ३ सय ५ मत भएको छ भने उनलाई निवर्तमान नगरप्रमुखसमेत रहेका नेकपा (एमाले)का मदनसुन्दर श्रेष्ठले सात हजार ८ यि ७ मतका साथ पछ्याइरहेका छन् ।
त्यस्तै गठबन्धनका उपप्रमुख उम्मेदवार माओवादीका विजयकृष्ण श्रेष्ठले नौ हजार ६ सय ५९ मतसहित अग्रता लिएका छन् । उनलाई एमालेका उत्तरा नेपालले छ हजार ४ सय ८५ मतले पछ्याइरहेका छन् ।