लोकञ्थली र म्हैपीमा चोरी

४ असार ०७९, काठमाडौं । भक्तपुरको लोकञ्थली र काठमाडौंको म्हैपीमा चोरी भएको छ । प्रहरीका अनुसार काठमाडौं महानगरपालिका १६ म्हैपी डेरा गरी बस्ने गोरखा भिमसेन गाउँपालिका २ घर भएका २० वर्षीय कपिल लामिछाने समेत ३ जनाको कोठाबाट नगद तथा सुन र चाँदीका विभिन्न गरगहना समेत गरी करिब ३ लाख ५४ हजार ४ सय रुपैयाँ बराबरको धनमाल बिहीबार दिउँसो चोरी भएको छ ।
भक्तपुर मध्यपुर ठिमी नगरपालिका १ लोकन्थली मनहरा डेरा गरी बस्ने सप्तरी अग्निसायर कृष्ण सवरण गाउँपालिका ३ घर भएका ३२ वर्षीय जीवन चौधरीको कोठाबाट सुनका विभिन्न गरगहना समेत गरी करिब ३ लाख ४५ हजार रुपैयाँ बराबरको धनमाल बिहीबार राति चोरी भएको छ ।
चोरीमा संलग्न फरार व्यक्तिहरुको खोजी गर्नुका साथै यस घटनाका सम्बन्धमा प्रहरीले आवश्यक अनुसन्धान गरिरहेको जानकारी दिएको छ ।