चन्द्रागिरि जङ्गलमा हराएका ३ विदेशीको उद्धार

१२ असार ०७९, काठमाडौं । प्रहरीले चन्द्रागिरि जङ्गलबाट तीन जना विदेशी नागरिकको उद्धार गरेको छ । शनिवार बेलुका झन्डै ७ बजेतिर तीन जना विदेशी चन्द्रागिरिको जङ्गलमा हराइरहेको सूचना आएपछि प्रहरी वृत्त थानकोटबाट टर्च, डोरी, स्ट्रेचर लगायतका सामग्रीसहित प्रहरी परिचालन भएको थियो । खोज्दै जाँदा थानकोटबाट सात किलोमिटरमाथि थानकोट–चित्लाङ सडकबाट एक सय मिटर तल भिरमा फसेको अवस्थामा उनीहरू भेटिएका प्रहरीले जनाएको छ ।

हराएका एक जना अमेरिकी र दुई जना भारतीयलाई राति डोरीको सहायताले उद्धार गरेर प्रहरी वृत्त थानकोटमा ल्याएर साथीहरूको जिम्मा लगाइएको प्रहरीले जनाएको छ ।