ठेचोमा नवदुर्गा भवानीको जात्रामा लागि दलचोकी जंगलबाट आज आगँसी ल्याइदै

ललितपुर खबर
१४ भदौं ०७९, चापागाँउ । गोदावरी नगरपालिका १२ ठेचोमा बर्षभरि मनाइने नवदुर्गा भवानीको बाह्र बर्षे जात्राका लागि आज दक्षिण ललितपुरको दलचोकीस्थित तीनपाने जंगलबाट आगँसी(दाउरा) लिन टोली प्रस्थान गरेको छ ।
आज विहान ठेचोबाट गुठीयारलागायत ठूलो मात्रामा स्थानीय आगँसी लिन प्रस्थान गरेको हो ।
नवदुर्गा भवानी देवि गुठीका नाइके भक्तलाल मालीले आज दिउँसो ३ बजे चापागाँउ शेराफाँटबाट झाँकी सहित आगँसी ठेचो देवघर नजिकै ल्याइने बताए ।
गत साउनं १० गते नवदुर्गा भवानी गुठीमा लगाइएको ताला असार ९ गते खोलेर पुजाआजापछि राँगोको बली दिइएको थियो ।
साइत अनुसार आज आगँसी लिन प्रस्थान गरेको उनले बताए ।
उनका अनुसार यो आगँसी असोज १६ गते सुनाकोठीस्थित कुल्पी(वालकुमारी मन्दिरपरिसर)मा यज्ञ गरिन्छ । यही यज्ञका लागि यो आगँसीको प्रयोग हुन्छ ।
आगँसी ल्याएपछि विभिन्न देवालयहरुमा नाच देखाइन्छ । यसलगत्तै साइत हेरेर विभिन्न ११ जलाशयबाट जल ल्याइन्छ । टिकाभैरव, छम्पी र नागदहलगायत विभिन्न देविहरुको तोकिएको जलाशयबाट जल ल्याइनछ ।
आँउदो कोजाग्रत पूर्णिमाको अघिल्लो दिन पाटन दरवार स्क्वायर परिसरमा नृत्य देखाइन्छ । असाज २४ गते ठेचो दुरीखेलमा देशभोजको आयोजना हुन्छ । भोज भव्यताका साथ आयोजना गरिने चलन रहेको माली बताउछन् ।
उनका अनुसार ११ वटा देवताहरुले विभिन्न छुट्टाछुट्टै परिकार ठेचो र सुनाकोठीमा बसोबास गर्ने नेवार समुदायका घरमुलीलाई कमलको पातमा सम्यबवी खुवाइन्छ । भोजमा सबै स्थानीय एक लाइनमा बस्ने र पस्कने गरिन्छ ।

जात्राका लागि गोदावरी नगरपालिकाले ५० लाख रुपैयाँ दिएको । ६० वटा वली र २८ वटा विभिन्न पुजा, नाच र भोजका लागि करिव ७६ लाख खर्च हुने बताइएको छ ।

साइत अनुसार आँउदो फागुन चैततिर जात्रा समापान हुन्छ ।