ललितपुर खबर
१६ भदौं ०७९, काठमाडौं । महाबौद्धस्थित उच्च शिखर सहकारीले बचतकर्ताको पैसा फिर्ता गर्न नसक्दा कार्यालय नै बन्द गरेर संचालक सम्पर्कविहीन भएका छन् ।
काठमाडौंको भोटेबहालमा कपडा पसल सञ्चालक सन्तोषी उप्रेती सहकारीले बचत फिर्ता नगर्दा हैरान छिन् ।
एक बर्षअघि नै ११ लाख बचतको समय पुरा भए पनि २ लाख बाहेक उनले पैसा पाएका छैनन् ।
करिव ८ लाखको चेक उनीसँग छ । सहकारी बैंकको चेक भएकाले बाउन्स गरेर मुद्दा दर्ता नगर्न समेत उनले पाएका छैनन् । उनी मात्रै होइन सहकारीमा पैसा लिन आउनेहरु ताल्चा हेरेर फर्कने धेरै छन् । केही महिनाअघि कार्यालय खुलेको बेला सहकारीका सञ्चालक हृदय नारायण गणेश गणेश कार्यालयमा बस्दैनथे । बचतकर्ता रामजी उप्रेती भन्छन्, ‘भेटे पनि मिठो कुरा गरेर टार्थे ।’
कार्यालय कहिले काँही मात्रै खुल्ने उच्च शिखरसँगै अर्को कार्यालयमा काम गर्ने कर्मचारीले बताए । उनले भने, ‘पैसा लिन धेरै मान्छे आउँछन् । तर कार्यालय उनीहरुलाई आवश्यक परेमात्र एकछिन खोल्छन् । अनि बन्द गर्छन् ।’ कार्यालयको सूचना पाटीमा केही दिनदेखि सम्पर्क नम्बर राखिएको थियो । तर पछिल्लो समय त्यो सम्पर्क नम्बर छैन ।
कार्यालयको फोन सम्पर्क गर्दा कहिले पनि उठ्दैन । बजार प्रतिनिधि केही दिनदेखि पैसा उठाउन नआएको उप्रतीले बताए ।
उनले बचतकर्ताको पैसा दिन नसकेपछि चेक नम्बर नभएको सहकारी बैंकको चेक दिने गरेका छन् । यो चेक बाउण्स नहुँदा मुद्दा दर्ता नहुने बचतकर्ता उप्रेतीको गुनासो छ ।
बचतकर्ता आत्माराम दाहालको पनि यस सहकारीमा २० हजार रुपैयाँ लिन बाँकी छ । उनी धेरै पल्ट पैसा लिन धाएपछि अहिले जानै छोडे । भन्छन्, ‘२० हजार पैसा लिन २० पल्ट गए । कति धाउनु ।’
बचत रकम फिर्ता नगरेको भन्दै सदस्यहरुले चर्को दबाब दिए पछि कार्यालय बन्द भएको एक उने बताए ।
संस्थाले विभिन्न बैंक तथा वित्तीय संस्था र नेपाल बहुउद्देश्यीय केन्द्रीय संघको चेक दिएर सदस्यहरुलाई झुलाई रहेका छन् । तर, यसरी झुलाउन थालेको करिब १ वर्ष हुँदा पनि सदस्यहरुले पैसा भने फिर्ता पाउन सकेको छैन ।
‘तपाईको भविष्यको बलियो आधार, उच्च शिखरले बनाउँछ सपना साकार’ भन्ने नाराका साथ पैसा उठाउने गरेको यस सहकारीले अन्नतः बचतकर्ताको भविष्य अन्धकार बनाएको छ ।
नेपाल बहुउद्देश्यीय केन्द्रीय संघको चेक दिएपनि साटिएको छैन । संघमा संस्थाको नाममा रहेको खातामा ३ हजार रुपैयाँ पनि पैसा नभएको स्रोतले जानकारी दियो ।
संस्थाका म्यानेजर हृदय नारायण गणेश संस्था समस्यामा रहेको र बचत फिर्ता गर्न नसकेको स्विकार गरे ।
प्रतिक्रिया