डेंगु संक्रमणबाट पत्रकार चाँदनी अधिकारीको निधन

१६ कात्तिक ०७९, लमजुङ । डेंगु संक्रमणबाट पत्रकार चाँदनी अधिकारीको मृत्यु भएको छ । लमजुङको रेडियो भोटेवडारमा कार्यरत अधिकारीलाई डेंगु सक्रमण भएपछि कात्तिक १५ गते लमजुङस्थित मोडल अस्पतालमा भर्ना गरिएको थियो ।

उनलाई थप उपचारका लागि बुधबार बिहान चितवन मेडिकल कलेज (न्यू सिएमसी) पु¥याइएकोमा उपचारकै क्रममा ६ः३० बजे निधन भएको नेपाल पत्रकार महासंघले जनाएको छ ।

महासंघका महासचिव रोशन पुरीले जारी गरेको विज्ञप्तिमा डेंगुका कारण अधिकारीको निधन भएकोमा महासंघ स्तब्ध भएको उल्लेख गरिएको छ । अधिकारीको निधनले नेपाली पत्रकारिता क्षेत्रले एक जुझारु र ऊर्जावान युवा पत्रकार गुमाएको उल्लेख गर्दै महासचिव पुरीले दिवंगत आत्माको चिरशान्तिको कामना गर्दै परिवारजनमा समवेदना प्रकट गरेका छन् ।