ललितपुरको लेलेस्थित वालकुमारी मन्दिरबाट तेत्तिस कोटी देवताको मुकुटहरु चोरी

ललितपुर खबर
१४ मंसिर ०७९, चापागाँउ । ललितपुरको लेलेस्थित वालकुमारी जलकुमारी मन्दिरबाट तेत्तिस कोटी देवताको मुकुटहरु चोरी भएको छ । महानगरिय प्रहरी बृत्त चापागाँउका प्रहरीका अनुसार बुधबार रातको १ बजेतिर मुकुटहरु चोरी भएको हो । मन्दिरबाट २५ वटा मुकुटहरु चोरी भएको हो । भगवानहरुको आकृती भएको मुकुटहरु तामाको थियो ।
ललितपुर प्रहरी प्रवक्ता प्रहरी उपरिक्षक सुधिरराज शाहीका अनुसार चोरी गरिरहेको अवस्थाको सिसिटिभि फुटेज पनि फेला परेको छ । उनले भने, ‘अनुहार प्रष्ट देखिन्छ । दुई जना माथि शंका छ । अनुसन्धान भइरहेको छ ।’
उनका अनुसार मुकुटहरु २ सयदेखि ३ सय ग्राम तौल रहेको छ भने लम्बाई र चौडाई ५ इन्च रहेको छ । गोदावरी नगरपालिका ५ का वडाध्यक्ष मिलन सिलवालले नियमित रुपमा प्रहरी गस्ती हुने गरेको बताए । उनले भने, ‘मन्दिरमा पाले भने राखिएको छैन ।’