सन्तानेश्वर मन्दिरमा विराट महायज्ञ सुरु हुँदै

ललितपुर खबर, चापागाँउ
२४ पुस । ललितपुरको झरुवाराशीस्थित सन्तानेश्वर मन्दिरमा विराट ज्ञान महायज्ञ सुरु हुने भएको छ । यही माघ १२ गतेदेखि २२ गतेसम्म सन्तानेश्वर मन्दिरमा महायज्ञ सुरु हुने मन्दिर व्यवस्थापन समिती अध्यक्ष विनोद खड्काले ललितपुरखबरलाई बताए ।
हरेक ११ वर्षमा सन्तानेश्वरमा महोत्सव आयोजना हुँदै आएकोमा यसै अवसरमा सो महायज्ञ अनुष्ठान आयोजना गरिएको हो ।
यो अनुष्ठान भेटि संकलनका लागि आयोजना गरिएको नभई नित्यकर्म भएको अध्यक्ष खड्का बताउछन् । भन्छन्, ‘मन्दिरमा भेटि संकलनको उद्देश्य भन्दा पनि धार्मिक महोत्सवको रुपमा हामी यो अनुष्ठान सुरु गर्दैछौं । दावविरहरुले मनग्गे सहयोग गरिहाल्छन् ।’ महायज्ञको बाचक दिपक सापकोटा रहेका छन् ।

आफूहरुको काम र व्यवस्थापन देखेर भक्तजनहरुले सहयोग गर्ने उनी बताउछन् । भन्छन्, ‘हामी भक्तजनलाई प्रभावमा पारेर भेटि संकलन गर्ने लक्ष्य राख्दैनौं । राम्रो काम गर्छौं ।’ पछिल्लो समय सन्तानेश्वर महादेवको मन्दिर उपत्यकाकै महत्वपूर्ण धामका रुपमा विकसित भइरहेको छ । चारैतिर समथर जमिनको बीचमा रहेको टापुमा सन्तानेश्वर महादेव विराजमान छन् ।
मन्दिर व्यवस्थापन समितीले मन्दिरपरिसरमा निरन्तर पुर्वाधार निर्माण गरिरहेको छ । पछिल्लो समय मन्दिरपरिसरमा एक करोड २५ लाख लागतमा भजनमण्डललगायत विभिन्न पुर्वाधार निर्माण भइरहेको अध्यक्ष खड्का बताउछन् ।
उनका अनुसार गतसाउनमा यस मन्दिरमा भक्तजनको घुइचो थियो । मन्दिरमा दर्शन गर्न आउने भक्तजनले चढाएको भेटि मात्रै ४५ लाख पुगेको थियो ।
पछिल्लो समय मन्दिर प्रवेशका लागि तीनतिरबाट झण्डै ३ सय मिटर लामो सिडी र प्रवेशद्वार निर्माण मन्दिरमा पुजारी,प्रहरीका लागि भवनहरु निर्माण गरिएको छ ।