ठैवमा स्कुटर चालक उमालाई बसले ठक्कर दिएपछि मृत्यु

ललितपुर
२९ माघ । ललितपुरको ठैवमा स्कुटरमा सवार युवती उमा सिलवाललाई बसले ठक्कर दिएपछि मृत्यु भएको छ ।
प्रहरीका अनुसार गोदावरी नगरपालिका १४ ठैव धुसलधारामा बा.४ ख ८४३९ नम्बरको बसले बा.७० प ५८८ नम्बरको स्कुटरलाई आइतबार बिहान ठक्कर दिँदा स्कुटर चालक गोदावरी नगरपालिका ३ बस्ने २५ वर्षीया उमा सिलवालको मृत्यु भएको छ ।
ठक्करबाट गम्भीर घाइते भएकी उनको पाटन अस्पतालमा उपचारको क्रममा मृत्यु भएको हो ।
बस चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको जानकारी दिएको छ ।