नरभक्षी बाघ खोज्ने क्रममा १ जनाको शव भेटियो

११ मंसिर । मकवानपुरमा नरभक्षी बाघको खोजी गर्ने क्रममा १ जना व्यक्तिको शव फेला परेको छ। आइतबार मनहरि गाउँपालिका–६ राप्ती र लोथर खोलाको मध्यवर्ती दोभान क्षेत्रमा एक पुरुषको शव फेला परेको मकवानपुरका प्रहरी नायव उपरीक्षक (डीएसपी) लक्ष्मी भण्डारीले जानकारी दिए।

डीएसपी भण्डारीका अनुसार उक्त स्थानमा मंसिर ८ गते (शुक्रबार) बिहान चितवन राष्ट्रिय निकुञ्जबाट आएको बाघको आक्रमणबाट चितवनको राप्ती नगरपालिका बस्ने ४३ वर्षीय हरि पौडेलको मृत्यु भएको थियो। उक्त बाघ नियन्त्रणमा लिन निकुञ्जको टोली चार वटा हात्तीसहित मध्यवर्ती क्षेत्रमा प्रवेश गरेको थियो।
सोही नरभक्षी बाघ खोजी गर्ने क्रममा पहिचान नखुलेको एक पुरुषको शव फेला परेको हो। शवको कम्मरभन्दा तलको भाग मात्रै रहेको र कम्मरभन्दा माथिको भाग हड्डी मात्रै रहेको अवस्थामा फेला परेको डीएसपी भण्डारीले बताए।

ती पुरुषको शव हाल हेटौँडा अस्पतालमा ल्याइएको र घटनाबारे प्रहरीले अनुसन्धान गरिरहेको जनाइएको छ।