१६ मंसिर । मोटरसाइकललाई ठक्कर दिई फरार रहेका निशान गाडीका चालकलाई प्रहरीले पक्राउ गरेको छ ।
गत बिहीबार राति ११:५० बजे काठमाडौँ जिल्ला कागेश्वरी मनोहरा नगरपालिका वडा नं.५ थली स्थित सडकखण्डमा प्रदेश ३-०१-०० ३ क ६४८८ न.को निशान गाडी र बाग्मती प्रदेश ०२-०३२ प ३३४१ नं. को मोटर साइकल एक आपसमा ठक्कर खाई सवारी दुर्घटना भएको थियो ।
दुर्घटनामा मोटरसाइकल चालक शंखरापुर नगरपालिका वडा नं.८ साँखु निवासी अन्दाजी ३०-३२ वर्षका सुलभ मोक्तान र मोटरसाइकलमा पछाडि सवार डम्मर बहादुर तामाङ घाइते भएका थिए । दुवैलाई तत्काल उपचारार्थ शंखरापुर अस्पताल नारायणटार लगिएकोमा उपचारको क्रममा मोक्तानको शुक्रबार मृत्यु भएको थियो । त्यस्तै तामाङ पनि गम्भीर घाइते भएका रहेका छन् ।
दुर्घटनापछि निशान गाडी चालक काभ्रेपलाञ्चोक स्थायी ठेगाना भएका १९ वर्षीय सञ्जय स्याङ्तान गाडी छाडी फरार रहेका थिए । उनलाई प्रहरी वृत्त बौद्धबाट खटिई गएको प्रहरी टोलीले शुक्रबार ललितपुरको हरिसिद्धीमा लुकीछिपी बसेको अवस्थामा पक्राउ गरेको थियो । उनीमाथि सवारी ज्यान सम्बन्धी कसुरमा अनुसन्धान कार्य भई रहेको प्रहरीले जनाएको छ ।
प्रतिक्रिया