चलचित्र होस्टेल ३ निर्माणको घोषणा

काठमाडौँ

५ वैशाख । सफल चलचित्र होस्टेलको तेस्रो सिरिजको घोषणा गरिएको छ । बुधबार एक पोस्टर सार्वजनिक गर्दै ‘होस्टेल ३’को घोषणा गरिएको हो । यसलाई गायक समेत रहेका सशान कँडेलले निर्देशन गर्ने भएका छन् ।

‘होस्टेल’ श्रृंखलाका निर्माता सुनिल रावल तेस्रो श्रृंखलामा कलाकारको रुपमा मात्र रहने भएका छन् । उनले चलचित्र निर्माणको अधिकार सम्मान इन्टरटेन्मेन्टलाई दिएका छन् । चलचित्रको निर्मातामा शिशिर ज्ञवाली, कार्यकारी निर्माता शङ्कर कोइराला तथा सुधा मरहट्ठा, सुरेश कँडेल र अर्जुन सापकोटा सह निर्मातामा छन् । चलचित्रलाई यसै वर्ष छायांकन र प्रर्दशनको तयारी गरिएको छ ।

होस्टेलमा बसेर अध्ययन गरिरहेका टिनेजर र उनीहरुको भविष्यका घटनामा आधारित भएर चलचित्र बन्ने निर्देशक कँडेलले जानकारी गराएका छन् ।

माधव शर्माको पटकथा लेखन रहेको फिल्ममा निर्देशक कँडेल स्वयंको कथा छ । स्क्रिप्ट लेखनमा मात्र डेढ वर्ष लागेको माधवले बताएका छन् । यम प्रसाद ओलीको प्रोडक्सन डिजाइन रहने चलचित्रका लागि कलाकारहरु भने निश्चित हुन बाँकी रहेको जनाइएको छ ।