टिकाथलीबाट खैरो हेरोइनसहित तीन जना पक्राउ 

१५ साउन । महालक्ष्मी नगरपालिका-५ टिकाथलीबाट अवैध लागूऔषध खैरो हेरोइन ८९ ग्राम ८ सय ९० मिलिग्राम र डिजिटल तराजु १ थान सहित ३ जनालाई सोमबार दिउँसो प्रहरीले पक्राउ गरेको छ ।  पक्राउ पर्नेहरूमा सोही ठाउँ डेरा गरी बस्ने मोरङ पथरी शनिश्चरे नगरपालिका-१० ठेगाना भएका ३७ वर्षीय डिकेन्द्र भट्टराई तथा ३२ वर्षीय दिपेश कार्की र सिन्धुपाल्चोक बलेफी गाउँपालिका-३ ठेगाना भएका २७ वर्षीय लाल बहादुर तामाङ रहेका छन् । लागूऔषध नियन्त्रण ब्यूरो कोटेश्‍वरबाट खटिएको प्रहरीले उनीहरूको कोठा तलासी गर्दा उक्त लागूऔषध फेला पारी पक्राउ गरेको हो ।

यसैगरी ललितपुर, ललितपुर महानगरपालिका-२३ धापाखेल डेरा गरी बस्ने सिन्धुपाल्चोक भोटेकोशी गाउँफालिका-५ ठेगाना भएकी ३५ वर्षीया निमा डोमा तामाङलाई अवैध लागूऔषध खैरो हेरोइन ३ ग्राम ७ सय २० मिलोग्राम, डिजिटल तराजु १ थान र मोबाइल १ थान सहित सोमबार दिउँसो प्रहरीले पक्राउ गरेको छ । लागूऔषध नियन्त्रण ब्यूरो कोटेश्‍वरबाट खटिएको प्रहरीले उनको कोठा तलासी गर्दा उक्त लागूऔषध फेला पारी पक्राउ गरेको हो ।