यी ब्राण्डका पानीमा भेटियो दिसामा पाइने कोलिफर्म

१३ असोज । काठमाडौं महानगरपालिकाले विभिन्न ११ ब्रान्डका पानीको बिक्री वितरणमा रोक लगाएको छ । महानगरपालिकाले यी ब्राण्डका पानीमा मा ‘फिकल कोलिफर्म’ भेटिएकाले प्रत्येक ब्रान्डलाई २ लाख रुपैयाँ जरिबानासहित बिक्री वितरणमा रोक लगाएको हो ।
नमुना परीक्षण गरिएका २१ मध्ये ११ मा ब्राण्डका पानीमा फिकल कोलिफर्म देखिएको हो । प्रति १ सय मिलिलिटर नमुना परीक्षणमा ‘कोलोनी फर्मिङ युनिट’ मापदण्ड विपरीत देखिएको छ ।
यो फिकल कोलिफर्म दिसामा पाइन्छ । महानगरपालिकाले टोखा नगरपालिका–८ स्थित पञ्चरत्न ग्रुप, टोखा–८ मा रहेको पिस स्प्रिङ वाटर, अक्वा एसएनएस बेभरेज, कोलभोतेश्वर ब्रान्ड, कागेश्वरी मनोहरामा सञ्चालित उत्तरबाहिनी फुड एन्ड बेभरेज र गोकर्णेश्वरको अक्वा सुन्दरी उद्योगलाई प्रबिन्ध र कारवाही गरेको छ ।

यस्तै कागेश्वरी मनोहरा–६ को स्नो क्युब ड्रिंकिङ वाटर, गोकर्णेश्वरको स्तुपा इन्डस्ट्रीको उत्पादन क्युब प्रोसेस ड्रिंकिङ वाटर,गोकर्णेश्वरको मुनलाइट स्प्रिङ मिनरल वाटर, अक्वा कपन र अक्वा गौरशंकरलाई समेत कारवाही गरेको छ ।

कारबाही गरिएका पानी ब्रान्डले फिकल कोलिफर्म शून्य देखिएपछि बिक्री वितरण गर्न पाउने छन् । महानगरले गत भदौ १२ देखि २८ भदौमा विभिन्न स्थानबाट २० वटा पानीको नमुना संकलन गरेको थियो । साथै, उपभोक्ताले गुनासो गरेपछि थप एउटाको नमुना संकलन गरी काठमाण्डौ उपत्यका खानेपानी लिमिटेडको प्रयोगशालामा परीक्षणका लागि पठाइएको थियो ।