काठमाडौं आउँदै गरेको टाटा सुमो भकुण्डेबेँसीमा तोडफोड

२४ पुस । खोटाङबाट काठमाडौं आउँदै गरेको टाटा सुमो तोडफोड भएको छ । साइड नदिएको निहुँमा काभ्रेको भकुण्डेबेँसीबाट केही माथि पात्लेखेत भन्ने ठाउँमा तुवाचुङ यातायात प्रालिको बा १ ज ६१७२ नम्बरको टाटा सुमोमा तोडफोड गरिएको हो ।

असोज १० र ११ गतेको अविरल वर्षाका कारण गएको पहिरोले क्षतिग्रस्त वीपी राजमार्ग अहिले साँघुरो छ । विपरित दिशाबाट आउँदै गरेको गाडीलाई साइड नदिएको भन्दै उनीहरुले गाडीमा चारैतिर तोडफोड गरेको भिडियो क्लिपमा देख्न सकिन्छ ।

पछि सुमोका चालकले गाडी भगाएर काभ्रे प्रहरी चौकीसम्म पुर्याएका थिए । गाडी तोडफोड गरेको आरोपमा अहिले काभ्रे प्रहरीले ६ जनालाई नियन्त्रणमा लिएको छ ।