काठमाडौं आउँदै गरेको गाडी सिन्धुलीमा दुर्घटना, १ जनाको मृत्यु, पाँच घाइते

काठमाडौं । झापाबाट काठमाडौंतर्फ आउँदै गरेको निजी सवारी साधन दुर्घटना भएको छ । बीपी राजमार्गअन्तर्गत गोलञ्जोर गाउँपालिका–५ मा आज बिहान भएको दुर्घटनामा एकजनाको मृत्यु भएको छ । पाँचजना घाइते भएका छन् । एकजनाको अवस्था गम्भीर छ ।

जिल्ला प्रहरी कार्यालयका प्रहरी उपरीक्षक गोविन्दराज काफ्लेका अनुसार दुर्घटनामा गाडीचालक दोलखाको गौरीशंकर गाउँपालिका घर भएका २७ वर्षीय सुशान्त नेपालीको मृत्यु भएको हो ।

मोरङको लेटाङ नगरपालिका–२ का ३४ वर्षीय देवी लिम्बूको अवस्था गम्भीर छ । उनको सिन्धुली अस्पतालमा उपचार भइरहेको छ ।

इलाम देउमाई नगरपालिका–८ का ५३ वर्षीय सनबहादुर तामाङ, काठमाडौं कागेश्वरी मनोहरा नगरपालिका–५ का २८ वर्षीया श्वेता गिरी, सोही स्थानका २८ वर्षीय सञ्जय रोक्का, झापाको बाह्रगढी गाउँपालिका–१ का २७ वर्षीय किस्कु मण्डल घाइते भएको उनले जानकारी दिए ।