ललितपुरमा हरिसिद्धी नाच नचाइयो

ललितपुर । ललितपुरको हरिसिद्धीमा नाचिने हरिसिद्धी नाच आज नाचाइएको छ। एक दिन मात्र मनाउने यस जात्रामा पहिलो चरण बिहानको समयमा नातेश्वर महादेवको स्थानमा हरिसिद्धी देवीको स्मरण गरी भक्तिपूर्वक बाध्य वादन (द्योग ल्हायगु) गरी हरिसिद्धी मन्दिर अगाडि पुग्छन्। एकैछिनको मन्दिर अगाडि पालैसित नाचेर मन्दिर माथि जान्छन्।

त्यसपछि अदृश्य नाच सुरु हुन्छ। यस नाचमा बाजाहरु भुस्या, प्वङ्गा, डमोखि, ताँः बजाउँछन्। यसरी विविध तालमा बाजा बजाउन सुरु हुन्छ। यस समयमा अगाडिको डबलीमा कोही पनि जान हुँदैन। त्यस समयमा स्वयम् हरिसिद्धी देवी नाच्ने जनविश्वास गरिन्छ।

यस पश्चात तमनारिश्व महादेवको नाच सुरु हुन्छ। यस समयमा निसन्ताले आफ्नो सन्तान प्राप्तिको लागि व्रत बसी पूजा गर्दा सन्तान प्राप्त हुने जनविश्वास छ ।