महानायक राजेश हमाल कुनै तडकभडक विना चलचित्र ‘नरसिंहाः अवतार’को प्रचारका निस्किएका छन् । अघिल्ला चलचित्रहरुमा महानायक हमाल बडिगार्डसहित चलचित्र भवन पुग्ने गरेका थिए ।
यस पल्ट महानायक हमाल सामान्य रुपमा नै दर्शकमाझ पुगेर दर्शकसँग कुराकानी गर्ने र सेल्फी खिच्ने गरेको देखिन्छ । चलचित्रको प्रचारका लागि सामान्य रुपमा प्रस्तुत भइरहेको सम्बन्धमा महानायक हमालको सादगीपनको उदाहरण भएको भन्दै प्रशंसा भैरहेको छ ।
महानायक राजेश हमालसहित कलाकारहरुको टोली चलचित्र ‘नरसिंहाः अवतार’को प्रचारका लागि देश दौडाहामा हिडेको हो ।
निर्देशक दीवाकर भट्टराईका अनुसार कलाकारहरुको टिम नेपालको पश्चिमका सहरतर्फ हिडेकोछ । चलचित्रको टिमले आज ‘ नेपालगञ्ज र धनगढीका दर्शकसँग साक्षात्कार गरेको छ । टिम भोलिबाट दाङ, बुटवल, नारायणगढ हुँदै काठमाडौं फर्किने तयारीमा छ । पश्चिम नेपालका दर्शकले पनि महानायक राजेश हमालसहितको टिमलाई न्यानो स्वागतसँगै उच्च साथ र सहयोग मिल्ने अपेक्षा निर्माण टिमको छ ।
सोमबार पूर्वी नेपालमा विभिन्न शहरमा पुगेर दर्शकसँग साक्षात्कार गरेको टिम मंगलबार काठमाडौं फर्केको थियो । पूर्वी नेपालमा इटहरी, बिर्तामोड, दमक, बिराटनगर र धरानका विभिन्न सिनेमा हलमा पुगेको नरसिंहा अवतार टिमले दर्शकको उल्लेख साथ पाएको जानकारी निर्माण नरेन्द्र महर्जनले दिए ।
गत शुक्रबार जेठ ९ गतेबाट महानायक राजेश हमालको कमव्याक सिनेमा ‘नरसिंहाः अवतार’ प्रदर्शनरत छ । यो सिनेमाले रिलिजको पहिलो दिन शुक्रबार र दोस्रो दिन शनिबार देशभर उत्साहजनक ओपनिङ गरेको थियो । तेस्रो दिन आइतबारबाट पनि सुखद् व्यापार गरिरहेको वितरक करण श्रेष्ठले जानकारी दिए ।
करिब १० वर्षपछि महानायक राजेश हमाल कुनै सिनेमाका लागि दर्शक साक्षात्कारका लागि मोफसल यात्रामा निस्केका थिए । पूर्वी नेपालमा दर्शकले महानायक हमाललाई न्यानो स्वागत गरेका थिए । पूर्वी नेपालमा हलमा महानायक पुग्दा सेल्फी खिच्न दर्शकबीच तछाडमछाड नै चलेको थियो । त्यही क्रेजलाई ध्यानमा राख्दै नरसिंहा अवतार टिम आज बुधबार महानायक राजेश हमाललाई लिएर पश्चिम नेपालको यात्रामा निस्केको छ ।
क्रियटिभ सिने आट्र्सको ब्यानरमा नेम महर्जन, दीपक ढकाल, नरेन्द्र महर्जन र ध्रुव न्यौपानेको लगानी छ । सिनेमामा राजेश हमाल, राज कटुवाल, नीति शाह, सनिषा भट्टराई, नीर शाह, प्रशान्त ताम्राकार, राजिभ जंग बस्नेत, रमेश चन्द सोडारी, दीपा शाही लगायतका कलाकारहरुको अभिनय छ । राजु विक्रम थापाको छायांकन तथा साहिल खानको सम्पादन रहेको छ ।
प्रतिक्रिया