काठमाडौं । आइतबार राति काठमाडौँ उपत्यकासहित आसपासका क्षेत्रमा वर्षा भइरहेको छ। यसैबीच बाढी पूर्वानुमान महाशाखाले काभ्रेपलाञ्चोक र भक्तपुर जिल्लामा पछिल्लो एक घण्टामा मध्यम वर्षा मापन भएको भन्दै ससाना खोलामा बहाव बढ्न सक्ने चेतावनी जारी गरेको छ।
महाशाखाले राति ९ बजे जारी गरेको सूचना अनुसार,“काभ्रेपलाञ्चोक जिल्लास्थित नाला वर्षा मापन केन्द्र र भक्तपुर जिल्लास्थित नगरकोट वर्षा मापन केन्द्रमा पछिल्लो १ घण्टामा मध्यम वर्षा मापन भएकाले ती क्षेत्र हुँदै वहने ससाना खोलामा बहाव बढ्न सक्ने देखिएको छ। तसर्थ, स्थानीयवासी र सरोकारवालाहरूलाई आवश्यक सतर्कता अपनाउन आग्रह गरिन्छ।”
हाल काठमाडौँ उपत्यका, ललितपुर, भक्तपुर र आसपासका क्षेत्रमा वर्षा निरन्तर भइरहेकाले पहिरो सम्भावित क्षेत्र, नदीनाला किनारका बस्ती र यात्रुहरूलाई विशेष ध्यान दिन मौसमविद्हरूले सुझाव दिएका छन्।
जल तथा मौसम विज्ञान विभाग अन्तर्गतको बाढी महाशाखाले बाढीसम्बन्धी पूर्वानुमान अद्यावधिक गर्दै सतर्कता सूचनाहरू जारी गरिरहेको छ।
प्रतिक्रिया