तारकेश्वरमा मृत भेटिएकी महिलाको सनाखत

काठमाडौं । काठमाडौंको तारकेश्वरमा आज बिहान मृत अवस्थामा भेटिएकी महिलाको सनाखत भएको छ। जिल्ला प्रहरी परिसर काठमाडौंका प्रवक्ता प्रहरी उपरीक्षक (एसपी) अपिलराज बोहराका अनुसार मृतक महिला २६ वर्षीया तिलमाया तामाङ हुन्।

धादिङको ज्वालामुखी गाउँपालिका–३ स्थायी घर भई हाल तारकेश्वर नगरपालिका–४ शेषमतीमा बस्दै आएकी तामाङ आज बिहान तारकेश्वर–८ स्थित पिपलडाँडा टुसालचौर खेल मैदानको फलामे बारमा झुण्डिएको अवस्थामा मृत फेला परेकी हुन्।

उनकी दिदी केशरीमाया पुलामीले तिलमाया गएरातिदेखि सम्पर्कविहीन रहेको जानकारी दिएकी थिइन्। प्रहरीका अनुसार घटनाबारे थप अनुसन्धान भइरहेको छ। प्रारम्भिक रुपमा आत्महत्या हुनसक्ने आशंका गरिएको छ तर सबै पक्षबारे अनुसन्धान जारी रहेको बताइएको छ।