सिन्धुली । सिन्धुलीको हरिहरपुरगढी गाउँपालिका–१ बस्तीपुरमा रुख ढल्दा दुई बालबालिकाको मृत्यु भएको छ भने तीनजना घाइते भएका छन्।
जिल्ला प्रहरी कार्यालय सिन्धुलीका प्रमुख एसपी लालध्वज सुवेदीका अनुसार आज शुक्रबार दिउँसो करिब ३:३० बजे झरीका कारण ओत लाग्न बसेका बालबालिका टहरोमा रहेको बेला सालको ठूलो रुख ढलेर किचेको हो।
दुर्घटनामा परी ९ वर्षीय सार्की थिङ र १६ वर्षीया सन्ता गोलेको घटनास्थलमै मृत्यु भएको प्रहरीले जनाएको छ। घटनामा १४ वर्षीया सिर्जना माया, १५ वर्षीया सन्ध्या भोलन र ७ वर्षीय सुशील थिङ घाइते भएका छन्।
गम्भीर घाइते सिर्जना र सन्ध्यालाई थप उपचारका लागि हेटौडातर्फ रिफर गरिएको छ भने सुशील थिङको उपचार पाँचपाण्डव पोलिक्लिनिक, झुरझुरेमा भइरहेको छ।
प्रहरीका अनुसार ओत लाग्ने क्रममा पहिरो र झरीका कारण सालको रुख अचानक ढलेको थियो।
प्रतिक्रिया