ललितपुर । ललितपुर महालक्ष्मीथानस्थित मितेरी सहकारी ठगीको अनुसन्धान केन्द्रीय अनुसन्धान ब्युरो (सीआईबी)ले टुंग्याएको छ। सीआईबीले ठगीमा संलग्न ११ जनालाई प्रतिवादी बनाउने रायसहित जिल्ला सरकारी वकिल कार्यालय ललितपुरमा प्रतिवेदन बुझाएको छ।
प्रहरीले अहिलेसम्म बर्दियाका ४२ वर्षीय ज्योतिबहादुर भण्डारी, सुरेश अधिकारी र धादिङका सुवास खत्रीलाई पक्राउ गरेको छ। अन्य ८ जनासँगै मुख्य आरोपी ज्योति गुरुङ फरार रहेको सीआईबीका प्रवक्ता एसपी युवराज खड्काले बताए।
ज्योति कांग्रेसका उपसभापति धनराज गुरुङकी पूर्वपत्नी हुन्। धनराज गुरुङको संलग्नता भएको आरोप लागेपनि अनुसन्धानमा पुष्टि नभएको र उनलाई प्रतिवादी बनाइएको नभएको सीआईबीले जनाएको छ। पक्राउ परेकाले पनि बयानमा धनराजको संलग्नता देखाएका छैनन्।
सीआईबीको अनुसन्धानअनुसार मितेरी सहकारीमा १४ करोड रुपैयाँको अपचलन भएको छ। यसबाहेक रकम फिर्ता गराइदिने भन्दै थप ३ करोड रुपैयाँ ठगी गरेको पाइएको छ। अनुसन्धानको क्रममा ६ अर्ब बढीको हुण्डी कारोबार पनि फेला परेको छ। सीआईबीले यस सम्बन्धमा ६ जनालाई प्रतिवादी बनाउने राय दिएको छ, जसमा फरार ज्योति गुरुङसमेत छन्।
सुवास खत्री क्रिप्टोमा पनि संलग्न रहेको पाइएको छ। उनले २,१४९ अमेरिकी डलर क्रिप्टोमा लगानी गरेका थिए र यसमा पनि उनलाई प्रतिवादी बनाउन सुझाव दिइएको छ।
ज्योति गुरुङसहित ११ जनालाई सहकारीको १७ करोड रुपैयाँ सामूहिक बिगो कायम गरिएको छ। यसमध्ये ६ जनालाई ६ अर्ब रुपैयाँको हुण्डी बिगो थप गरिएको छ। अनुसन्धानले देखाएको छ कि हुण्डी रकम कम्बोडिया लगायत विभिन्न देशमा पठाइएको थियो।
ज्योतिबहादुर भण्डारीलाई कम्बोडियाबाट पक्राउ गरेर नेपाल ल्याइएको थियो। तर मुख्य आरोपी ज्योति गुरुङसमेतलाई अझै पक्राउ गर्न सकेको छैन। अब, जिल्ला सरकारी वकिल कार्यालय ललितपुरले प्रतिवेदन अध्ययन गरी केही दिनमै अदालतमा अभियोग पत्र दायर गर्ने तयारी गरेको छ।
प्रतिक्रिया