ललितपुर धापाखेलमा भारतीय इन्जिनियरको हत्या भएको खुलासा

ललितपुर 

ललितपुर महानगरपालिका २४, धापाखेलमा डेढ महिनाअघि भारतीय नागरिक ४६ वर्षीय देव कुमारको हत्या भएको खुलेको छ ।

मृतक देव कुमार चौधरी ग्रुपद्वारा निर्माणाधीन कोलोनीको डिजाइन कामका लागि नेपाल आएका थिए ।

प्रहरीका अनुसार, उनी निर्माणाधीन कोलोनीको बाथरुममा मृत फेला परेका थिए। घटनास्थलमा देव कुमारको हातखुट्टा र मुख बाँधिएको र टाउकामा धारिलो हतियारले प्रहार गरिएको अवस्थामा शव भेटिएको थियो।

हत्याको कारण र घटनामा संलग्न व्यक्तिहरूको पहिचान अझै खुल्न सकेको छैन।

ललितपुर जिल्ला प्रहरी परिसर र काठमाडौँ उपत्यका अपराध अनुसन्धान कार्यालयको टोलीले अनुसन्धान जारी राखेको छ। प्रहरीले कोलोनीमा कार्यरत कामदारहरूमा निगरानी बढाएको छ।