काठमाडौं । मध्यपुरथिमि नगरपालिका–२ सानोथिमिस्थित बाल सुधारगृहमा झडपपछि आगजनी र तोडफोड भएको छ । सुधारगृहभित्र रहेका दुई समूहबीच भएको झडप नियन्त्रण बाहिर जाँदा आगजनीको घटना भएको हो ।
झडप सुरु भएपछि थिमि प्रहरी वृत्तका प्रमुख नवराज ढुङ्गानाको नेतृत्वमा प्रहरी टोली घटनास्थल पुगेको थियो । तर झडपमा संलग्न दुवै समूहले प्रहरीमाथि ढुङ्गामुढा गरेपछि स्थिति थप तनावग्रस्त बनेको थियो । अवस्था नियन्त्रणभन्दा बाहिर गएपछि सशस्त्र प्रहरी बलका ५० जना सुरक्षाकर्मी परिचालन गरिएको प्रहरीले जनाएको छ ।
मध्यरातमा भक्तपुर र काठमाडौंबाट पुगेका वारुणयन्त्रको सहयोगमा आगो निभाइएको थियो । आगलागीबाट भएको क्षतिको विस्तृत विवरण भने आउन बाँकी रहेको थिमि प्रहरी वृत्तले जानकारी दिएको छ ।
हाल उक्त बाल सुधारगृहमा १४५ पुरुष र २४ महिला गरी जम्मा १६९ जना आश्रित रहेका छन् । अहिले स्थिति नियन्त्रणमा आइसकेको भए पनि सम्भावित जोखिमलाई मध्यनजर गर्दै सुधारगृह परिसरमा बाक्लो संख्यामा सुरक्षाकर्मी परिचालन गरी निगरानी बढाइएको छ ।
प्रतिक्रिया